செய்தித்தொண்டு!!

காலையில்தான் அந்த செய்தியை பார்த்தேன். என் கண்களை என்னால் நம்பவே முடியவில்லை. உறுதி செய்வதற்காக உடனே ஓடிப்போய் வேறு சில தமிழ் நாளிதழ்களையும் வாங்கி வந்து சரி பார்த்தேன். உண்மைதான்!


செய்தியாளர்கள், சமூகத்திற்கு செய்யும் தொண்டு என்பது காந்தி நாட்டுக்கு செய்தது, தெரசா மக்களுக்கு செய்தது, இவை எல்லாவற்றுக்கும் சமமானது என்று உணர இந்த ஒரு தகவல் மட்டுமே போதும் என்பதால் உடனே எழுத ஆரம்பித்து விட்டேன். இந்த ஒரு செய்தி கவனிக்கபடாமல் போயிருந்தால் அதனால் நம் சமூகத்திற்கு ஏற்பட்டிருக்கக்கூடிய இழப்பு என்பது கூடங்குளம் அணுமின் நிலையம் விபத்துக்கு உட்பட்டால் ஏற்பட கூடியதை விட கொடூரமானதாக இருந்திருக்கும். ஆனால் அப்படி எதுவும் நடக்கவில்லை. செய்தியாளர்களின் தனிப்பட்ட சமூக அக்கறையாலும்,
அவர்தம் உயரிய நோக்கினாலும் மட்டுமே இந்த மாதிரி செய்திகள் நம் கவனத்திற்கு கொண்டு வரப்படுகின்றன. அவர்களுக்கு என் மானசீகமான நன்றியை கூறுகிறேன். படித்தபிறகு நீங்களும் கூறுவீர்கள் கண்டிப்பாக!!


பீடிகைகள் போதும். நேரடியாக விசயத்திற்கு வருகிறேன். செல்வராகவன்
அப்பவாகிறார் என்ற செய்திதான் அது. உலகத்தில் குறிப்பாக இந்தியாவில் இதுவரை நாம் பார்த்தே இராத நிகழ்வு இது, அல்லது வெகு அரிதாக நடக்கும் நிகழ்வு.
எனக்கு ஆச்சர்யம் இதுதான்! செல்வராகவனுக்கு பல மாதங்களுக்கு முன் திருமணமானது. அதன் பிறகு சில மாதங்களுக்கு பிறகு இந்தியாவில் குறிப்பாக தமிழகத்தில் நடிகர் கார்த்திக்-கு மட்டும்தான் திருமணம் நடந்தது.மற்ற யாருக்கும் திருமணம் மட்டுமல்ல வேறு எதுவும் நடந்ததாக தகவல் இல்லை. இந்த ஒரு விசயம்தான் இதை குறிப்பிட்டு சொல்லும்படியான நிகழ்வாக்குகிறது.


இன்று நான் படித்த செய்தி மேற்கண்ட இரு விசயங்களையும் விட சிறந்தது, போற்றக்கூடியது.
"உலகில் எங்கும் இல்லாத அதிசயமாக திருமணமான ஒருவர் அப்பாவாகிறார்!!! "
கேட்பதற்கே மகிழ்ச்சி அளிக்கிறது.


இனி மனித இனம் தழைத்து விடும் என்ற நம்பிக்கையும் எனக்கு பிறக்கிறது.


யாராலும் செய்ய முடியாத விஷயத்தை சாதித்ததற்க்காக செல்வராகவனுக்கு  வாழ்த்துக்கள்!!!


 இந்த செய்தியை உலகத்திற்கு அளித்து உலகம் செழிக்கும் என்ற நம்பிக்கை கீற்றை கொடுத்ததற்காக நிருபர்களுக்கு நன்றி!!!


                    --- காளிராஜ்